إكتب بالأحمر

إكتب بالأحمر
- إكتب بالأحمر على مرأة مڨدية
لهجتها جندوبية، خرجت من دشرتها تلوج على خبزتها،
دمعتها في عينيها حد ما حن عليها
وقد ما طاحت، إتذلت، تمرمدت، تعذبت، لا نهار شكات لمَاليِهَا .
- إكتب بالأحمر على طفل صغير
يمشي يقرى حفيان، بكراسة و استيلوا يقاوم صقيع الشتاء،
مهما يرى الذل ألوان، ديمة قلبوا بالحب مليان.
-إكتب بالاحمر عليها وعليه،
إكتب على دنيا ظلمتهم،فرقتهم،من حبهم حرمتهم.
قلولهم حبكم خرافة،كذبة،فيقوا من ها الخُنَار ، في الجنة إتكونوا احرار،
زعمة كي بعدو ماذقوش النار ؟
ميل على اليسار إكتب أشعار
أحرق بالنار لحية كل غدار ،
ضد حلمة، ضد إستقرار .
بمطرقة ومنجل أقف قدام الريح وصيح.
أغزر للوجوه و اكتب بالاحمر
-إكتب على مراة كبيرة، تخدم في الحضيرة
في وجها أقرا تاريخ المدينة تركينا .. تركينا
أقرا إلي فاتك من حياتك والي مازلت ماعشتوش
و أعرف السر اللهي في وشام على جبينها منقوش
-إكتب بالاحمر و أحكيلي على الشاعر إلي تحبس
كيف قال الحق ترفس
الكلام في صدره تكبس
يرصف حروفه بين كفوفه كل ليلة
يلقى ابدعه إنعس .
-إكتب على بلادك، إكتب على عرّقْ أجدادك إلي السمسارة شربوه،
على لحية مِكريةْ وقَميص مسرُوق، على غنَاية منْسية ولحن مبّحوح.
إكتب عليّ يعفس عليك ويقولك سامحني إنت شكون ؟؟
إكتب بالأحمر، إكتب بلون الدم إلي سال على أرضك البور